Транспорт вазирининг биринчи ўринбосари Маманбий Омаров Осиё тараққиёт банки вакиллари билан Яшил иқлим фондининг “Электромобиллик дастури”ни молиялаштириш билан боғлиқ масалаларни муҳокама қилди. Бу ҳақда Транспорт вазирлиги матбуот хизмати хабар берди.
Қайд этилишича, етти мамлакатда, жумладан, Ўзбекистонда амалга оширилиши режалаштирилган мазкур дастурни молиялаштириш бўйича таклиф этилаётган маблағ 170 миллион долларни (заём маблағининг 65 миллион доллари грант ва қолган 105 миллион доллари қарз) ташкил этади.
Ушбу дастур тижорат электромобилларини оммалаштиришдаги тўсиқларни бартараф этишга қаратилган. Шунингдек, у электробуслар паркини ва ёрдамчи инфратузилмани жойлаштириш, жамоат транспорти тизимини яхшилаш ҳамда унинг барқарорлигини таъминлаш, шунингдек, электромобилларни ривожлантиришга қаратилган давлат сиёсатини қўллаб-қувватлашни кўзда тутувчи 4 та йўналишни ўз ичига олади.
Сентябр охирларида Осиё тараққиёт банки (ОТБ) Ўзбекистоннинг 2023 ва 2024 йил учун иқтисодий ўсиши прогнозини яхшилаганди. Ундан олдинроқ эса ОТБ Ўзбекистон энергия тақсимлаш тизимини рақамлаштиришга 200 млн доллар қарз ажратиши маълум бўлган эди.
Изоҳ (0)