Осиё тараққиёт банки шу йилнинг ўзида Ўзбекистон билан 3,5 миллиард долларга яқин миқдорда 25 та лойиҳа имзолаган, деб хабар бермоқда ЎзА.
Хабарга кўра, Осиё тараққиёт банки (ОТБ) томонидан Марказий ҳамда Ғарбий Осиё ҳудудларида амалга оширилаётган лойиҳаларнинг 17 фоизи Ўзбекистонга тўғри келмоқда. Ўзбекистон минтақада бу кўрсаткич бўйича иккинчи ўринда. Жорий йилда жами 3,5 миллиард долларга яқин миқдорда 25 та лойиҳа имзоланган.
Осиё тараққиёт банки Ўзбекистоннинг 2023 ва 2024 йил учун иқтисодий ўсиши прогнозини яхшилагани хабар қилинганди.
Ҳисоботда қайд этилишича, Ўзбекистон иқтисодиёти яқин икки йилда ҳар йили 5,5 фоизга ўсади. Апрель ойида банк 5 фоизлик иқтисодий ўсишни прогноз қилганди. Прогнозни яхшилашнинг сабаблари орасида Россияга озиқ-овқат ва тўқимачилик маҳсулотлари экспортининг кўпайиши ҳамда инвестицияларнинг ўсиши кўрсатилган.
Ўзбекистон иқтисодиёти биринчи ярим йилликда 5,6 фоизга ўсган ва бу кутилганидан юқори. Бу фискал рағбатлантириш, мустаҳкам ташқи савдо, саноатнинг ўсиши ҳамда тоғ-кон саноати ва инвестицияларнинг кўпайиши билан қўллаб-қувватланган. Бироқ инфляция туфайли истеъмол секинлашган.
Изоҳ (0)