Isroil harbiylari G‘azo sektoridagi HAMAS harakati tomonidan foydalanilgan tunnellarni suvga bo‘ktirish imkoniyatini ko‘rib chiqmoqda. Shu maqsadda ular nasos tizimini o‘rnatdi, uning quvvati yerosti yo‘laklariga suv bostirish va ulardan HAMAS jangchilarini haydab chiqarish imkonini beradi, deb yozdi The Wall Street Journal (WSJ) 4-noyabr kuni AQSH hukumati ismi oshkor etilmagan amaldorlariga tayanib.
Noyabr oyi o‘rtalarida Isroil mudofaa kuchlari Ash-Shati qochqinlar lageridan bir yarim kilometr shimolda kamida beshta nasos o‘rnatish ishlarini yakunlagan. Gazetaning yozishicha, soatiga minglab kubometr suv bilan yerosti tarmog‘i bir necha hafta ichida butunlay suv ostida qolishi mumkin. Isroil nasoslardan barcha garovga olinganlar qo‘yib yuborilishidan oldin foydalanmoqchimi yoki keyin, xabarda aytilmagan
Tunnel tizimi harbiy maqsadlarda ishlatiladi
Reuters xabariga ko‘ra, Isroil armiyasi vakili tunnellarga suv bostirish rejasi tafsilotlarini izohlashdan bosh tortgan, biroq shunday degan:
“Isroil mudofaa kuchlari turli yo‘llar, turli harbiy va texnologik vositalar yordamida HAMASning terrorchilik imkoniyatlarini yo‘q qilishga urinmoqda”.
HAMAS uzoq yillardan beri harbiy maqsadlarda keng ko‘lamli yerosti yo‘laklaridan foydalanib keladi. Isroil armiyasi da’vo qilishicha mamlakatga hujum paytida HAMAS aynan ushbu tunnellar yordamida Isroil hududiga kirgan. Isroil armiyasi noyabr oyida G‘azo sektoridagi “Ash-Shifo” kasalxonasi ostidagi tunnelni ham topdi.
Izoh (0)