Олмаотадаги ҳостелда 30 ноябрь куни содир бўлган ёнғин туфайли 13 киши, шу жумлада икки нафар Ўзбекистон фуқароси ҳалок бўлганди. Ташқи меҳнат миграцияси агентлиги уларнинг жасадларини Ўзбекистонга қайтариш чоралари кўрилаётганини маълум қилди.
Ёнғин 30 ноябрь куни тонгида Қозоғистоннинг Олмаота шаҳри Ади Шарипов кўчасида жойлашган Almaty Hostel’да юз берган.
Дастлабки маълумотларга кўра, асосан талабалардан иборат 72 киши яшаган 457 квадрат метр майдонга эга ҳостел ертўласи коридоридан бошланган ёнғин оқибатида 13 киши ҳалок бўлган.
Ҳалок бўлганларнинг икки нафари, яъни 2000 йилда туғилган Н.А.ва 2000 йилда туғилган С.К. Ўзбекистон фуқаролари ҳисобланади.
Ҳозирги вақтда мазкур ҳолат мамлакатимизнинг Олмаота шаҳридаги Бош консулхонаси ва Ташқи меҳнат миграцияси агентлиги ваколатхонаси томонидан назоратга олинган ҳамда вафот этган юртдошларимизнинг жасадларини Ўзбекистонга қайтариш чоралари кўрилмоқда, — дейилади агентлик хабарида.
Изоҳ (0)