Olmaota viloyati hokimligi rahbari hosteldagi yong‘inda halok bo‘lgan qozog‘istonliklarning oilasiga 1 million tengedan (taxminan 2 ming 174 dollar) pul ajratilishini ma’lum qildi. Bu haqda “Nur.kz” xabar berdi.
“Shahar hokimi topshirig‘iga ko‘ra, avvalroq jasadlarni tashish bo‘yicha yordamga qo‘shimcha ravishda Qozog‘iston vafot etgan har bir fuqarosi uchun 1 million tengedan ajratadi. Bugun hokim qarorga imzo chekdi”, — dedi tuman hokimi Aydar Jakibayev.
Uning qo‘shimcha qilishicha, moddiy yordam faqat qozog‘istonlik oilalarga ajratiladi — halok bo‘lganlar orasida Rossiya va O‘zbekiston fuqarolari bo‘lgani uchun ularga jasadlarni dafn etiladigan joyga olib borishda yordam ko‘rsatiladi.
Hosteldagi yong‘in
Olmaotadagi hostelda 30-noyabr kuni ertalab yong‘in sodir bo‘ldi. Favqulodda vaziyat vaqtida hostelda 72 kishi bo‘lgan. Ularning aksariyati evakuatsiya qilinishga muvaffaq bo‘lgan. Qutqaruvchilar yetib kelgach, 13 kishining jasadini topgan. Ikki kishi favqulodda vaziyat joyidan shifoxonalarga yetkazilgan.
Shuningdek, hostelda xorijliklar — O‘zbekiston, Hindiston va Pokiston fuqarolari bo‘lgan. Yong‘in oqibatida ikki nafar o‘zbekistonlik, ikki nafar rossiyalik halok bo‘lgan.
Qozog‘iston prezidenti Qosim-Jo‘mart To‘qayev yong‘inda halok bo‘lganlarning oila a’zolariga hamdardlik bildirdi. Shuningdek, u yong‘inga aybdorlar javobgarlikka tortilishini aytdi.
Izoh (0)