Yandex.Gо хизмати 1 декабрдан бошлаб Ўзбекистон ҳудудида солиқ резиденти – Yandex.Gо UB МЧЖ юридик шахс томонидан тақдим этилади, деб хабар бермоқда Солиқ қўмитаси матбуот хизмати.
Қайд этилишича, шу кундан бошлаб Yandex.Gо хизмати ўз ҳисоб-китобларини Ўзбекистон қонунчилиги талаблари асосида юритади, бирламчи ҳужжатларни ва солиқ ҳисоботларини тақдим этади ҳамда белгиланган солиқларни тўлайди. Бу ҳақда Ridetech International B.V. Солиқ қўмитасини расмий хат орқали хабардор қилган.
Шу билан бирга, Yandex.Gо хизматини фискал маълумотлар оператори билан интеграциялаш бўйича ишлар якунланган. Ўзини ўзи банд қилган шахслар ва юридик шахслар мазкур сервис ёрдамида ташиш хизматини кўрсатганда мижозларга фискал чек бериш масаласи кўриб чиқилмоқда.
Шу тариқа, Yandex.Gо ўз фаолиятини қонун ҳужжатларига мувофиқлаштириш бўйича Солиқ қўмитаси томонидан қўйилган талабларни бажармоқда. Шунингдек, MyTaxi ва Uklon хизматларининг фискал маълумотлар оператори билан интеграциялаш ишлари ҳам якунланганини маълум қиламиз. Яқин кунларда улар орқали кўрсатилган ташиш хизматлари учун тўловларни фискаллаштириш кутилмоқда, — дейилади хабарда.
Изоҳ (0)