Миср муфтийси илк бор Ўзбекистонга келди

Миср муфтийси Шайх Шавқий Аллом илк бор Ўзбекистонга ташриф буюрди. Бу ҳақда Мусулмонлар идораси матбуот хизмати хабар берди.

Муфтий Бухорода Мир Араб мадрасасининг 500 йиллигига бағишланган “Боқий Бухоронинг ислом цивилизациясидаги ўрни” мавзусидаги халқаро илмий анжуманда иштирок этди. Тадбирда Халқаро мусулмон уламолари иттифоқи ва Абу-Даби тинчлик форумининг обрўли вакиллари, Ўзбекистон, Озарбайжон, Россия, Қозоғистон, Тожикистон, Туркманистон муфтийлари, машҳур олимлар, ислом тадқиқотчилари ва диний соҳа вакиллари, Мир Араб мадрасаси битирувчилари иштирок этган анжуманни Ўзбекистон мусулмонлари идораси раиси Шайх Нуриддин Холиқназаров очиб берди.  

Тадбирда хорижий меҳмонлар, жумладан, Шайх Шавқий Аллом Ўзбекистон, хусусан, Бухоронинг буюк олимлари қолдирган бой маънавий мерос ҳақида, мамлакатнинг ислом цивилизацияси ривожига қўшган ва қўшаётган ҳиссаси хусусида сўз юритди.  

Россия мусулмонлари диний бошқармаси бошлиғи муфтий Шайх Равил Ғайнутдин Мир Араб мадрасаси битирувчилари Россияда бухоролик муфтийлар деб аталиши, улар ислом илми марказларидан бири тарбияланувчиси сифатида ўзгача ҳурмат-эътиборга сазовор эканини таъкидлади.

Мир Араб мадрасаси битирувчиси, Кавказ мусулмонлари диний идораси раиси, муфтий Шайхулислом Оллоҳшукур Пошозода ўзбекча маъруза қилиб, Ўзбекистон ўзи учун иккинчи ватан эканини ифтихор билан қайд этди.