Ўзбекистон мусулмонлари идораси раиси, муфтий шайх Нуриддин Холиқназаров Мисрнинг Қоҳира шаҳрида ўтказилган анжуманда иштирок этди. Бу ҳақда идора матбуот хизмати хабар берди.
Қайд этилишича, ислом оламининг йирик уламо ва соҳа мутахассислари иштирокидаги ушбу “Фатво ва барқарор ривожланиш мақсадлари” номли анжуман 18 октябрь куни ўз ишини бошлади. Унда фатво ва мўмин-мусулмонлар ҳаётидаги муҳим масалалар таниқли уламолар, муфтийлар, дин ва давлат арбобларидан иборат жами 200 дан зиёд йирик делегатлар томонидан муҳокама қилинмоқда.
Халқаро конференцияда Шайх Нуриддин Холиқназаров нутқ қилиб, бугунги таҳдидларнинг олдини олиш учун бир қатор долзарб таклифларни илгари сурди. Хусусан, ахборот замонидаги ғоявий хуружлар ислом оламини ташвишга солаётгани, турли ихтилофлар келиб чиқаётгани, мана шундай муаммоларга ечим топишда Фатво идораларининг ўрни ниҳоятда катта экани, тинчлик-осойишталикни таъминлаш ва мусулмон уммати ҳамжиҳатлигига эришишда фатвонинг аҳамияти жуда муҳим эканини муфтий ҳазратлари изоҳлади. Шунингдек, ушбу йўналишда юзага келаётган муаммолар етарли илм ва малакага эга бўлмаган шахсларнинг фатво бериши оқибатида келиб чиқаётганини ҳам қўшимча қилди.
Муфтий ҳазратлари мана шундай муаммоларга ечим топишда ислом илм-маърифатга асосланган мўтадил дин эканини тарғиб қилиш, уламолар ҳамкорлигини мустаҳкамлаш ва мўмин-мусулмонлар эҳтиёжини таъминлаш кабилар эканини баён этди. Бундан ташқари, Интернет ва рақамли ахборот воситалари орқали адашган тоифалар дин ниқоби остида экстремизм, мазҳабсизлик, такфир ва мутаассиб қарашлар тарқатаётгани хавотирли ҳолат эканини алоҳида қайд этди.
Шайх Нуриддин Холиқназаров Ўзбекистонда сўнгги йилларда диний-маърифий соҳасидаги ижобий ўзгаришлар амалга оширилаётгани, жумладан, жаҳолатга қарши кураш ишлари жадал олиб борилаётгани, Марказий Осиёда ягона бўлган Фатво маркази самарали фаолият олиб бораётгани кабиларга ҳам алоҳида урғу қаратди.
Мазкур араб тилида қилинган нутқ ва барча учун долзарб аҳамиятга эга бўлган таклифлар анжуман иштирокчилари томонидан юқори баҳоланди.
Изоҳ (0)