Воқеа ноябрь ўрталарида “Сергели деҳқон бозори”да Миллий гвардия ходими ва фуқаро ўртасида юз берганди. Фуқаро ходимнинг қонуний талабларига бўйсунмай, жанжал кўтарган ва ҳодиса жойидан кетиб қолган. Миллий гвардия матбуот хизматининг маълум қилинишича, ушбу шахс топилиб, унга чора кўрилган.
Тезкор-қидирув тадбирлари натижасида мазкур ҳолатни 42 ёшли С.Ж. содир этгани аниқланган. Маълумотларга кўра, у Шайхонтоҳур туманида доимий яшайди, муқаддам Жиноят кодексининг 276-моддаси билан судланган. Оилали, муайян бир меҳнат фаолияти билан шуғулланмайди.
Фуқаро С.Ж. 2023 йилнинг 12 ноябрь куни Сергели тумани, Янги Сергели кўчасида жойлашган овқатланиш шохобчаси олдида бўла туриб, қўлидаги чиқиндиларни шу ерга ўрнатилган махсус чиқинди қутисига ташламай, пиёдалар йўлагига қасддан ташлаган.
Мазкур ҳолатни кўрган Миллий гвардия ҳарбий хизматчиси ҳуқуқбузарликни бартараф этиш мақсадида фуқарога белгиланмаган жойга ташланган чиқиндиларни махсус чиқинди қутисига ташлаш талабини қўйганида, С.Ж. талабларни бажаришдан бош тортиб, хизмат вазифасини бажараётган ҳарбий хизматчига фаол қаршилик кўрсатган.
Фуқаро ходимни омма олдида обрўсизлантиргани ва ҳақорат қилгани учун унинг хатти-ҳаракатлари юзасидан қонуний баҳо бериш мақсадида тўпланган ҳужжатлар Сергели туман прокуратурасига юборилган. Унга нисбатан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Ҳозирда мазкур ҳолат юзасидан дастлабки тергов ҳаракатлари олиб борилмоқда.
Аввалроқ Тошкент вилояти ҳудудида фуқаро ИИБ ходимларига пичоқ ўқталгани тасвирланган видео тарқалганди. Тошкент вилояти Ички ишлар бош бошқармасининг мазкур воқеа юзасидан тушунтириш беришича, у ИИБ ходимига пичоқ ўқталишидан аввал 40 ёшли фуқаронинг қорин соҳасига пичоқ санчиб, унга тан жароҳати етказган.
Изоҳ (0)