UNESCO Бош конференциясининг 43-сессияси 2025 йилда Самарқандда ўтказилади. Шавкат Мирзиёев ушбу қарорни қўллаб-қувватлаган барчага миннатдорчилик билдирди.
Кўпмиллатли Ўзбекистон халқи номидан ва шахсан ўз номимдан барча хорижий дўстларимиз ва шерикларимизга UNESCO Бош конференциясининг 43-сессиясини 2025 йилда қадим Самарқандда ўтказиш тўғрисидаги тарихий қарорни қўллаб-қувватлагани учун самимий миннатдорлик билдираман.
Минтақамизда биринчи марта ўтадиган ушбу муҳим глобал миқёсдаги тадбир халқаро ҳамжамиятга Ўзбекистон ва Марказий Осиё давлатларининг улкан сивилизацион салоҳиятини яна бир бор намойиш этишга хизмат қилади, деб ишонаман.
Ўз навбатида, Ўзбекистон бўлажак сессияни энг юқори савияда ташкил этиш ва ўтказиш учун барча кучини сафарбар этади, — дейди давлат раҳбари.
Сентябрь бошларида Ўзбекистон президенти ёрдамчиси Саида Мирзиёева Ўзбекистон UNESCO Бош конференциясининг 43-сессиясини 2025 йилда Самарқандда ўтказишга тайёрлигини маълум қилган эди. “Агар ушбу таклиф маъқулланса, бу тарихий воқеа UNESCO сессияларини фақат Парижда чақириш бўйича 40 йилдан ошиқ давом этган анъанани ўзгартира олади”, — деб ёзганди ўшанда Саида Мирзиёева.
Изоҳ (0)