Milliy gvardiya Toshkent shahri bo‘yicha boshqarmasi “Sergeli” dehqon bozorida xodim va fuqaro o‘rtasida yuz bergan janjal bo‘yicha ma’lumot berdi.
Qayd etilishicha, 12-noyabr kuni “Sergeli” dehqon bozorida jamoat tartibini saqlash uchun jalb qilingan Milliy gvardiya xodimi ushbu hududda bir fuqaro tomonidan qo‘lidagi plastik suv idishi va qog‘ozlarni yerga (belgilanmagan joyga) tashlagani uchun uni to‘xtatgan. Xodim o‘zini tanishtirib, fuqarodan tashlagan chiqindilarni yig‘ishtirib olishini va belgilangan joyga tashlashini so‘ragan, belgilanmagan joyga chiqindi tashlash va atrof-muhitni iflos qilganligi uchun maʼmuriy jazo borligi haqida ogohlantirgan.
Lekin ushbu fuqaro atrof-muhitni iflos qilgani va belgilanmagan joyga chiqindi tashlagani uchun o‘zini zarracha ham aybdor his qilmasdan, aksincha, xizmat vazifasini bajarayotgan xodimga nisbatan qo‘pol muomalada bo‘lib, tashlagan qog‘ozlarini olmasdan, “qo‘lingdan nima keladi?” deb qonuniy talablariga ochiqdan ochiq bo‘ysunmasdan, baland ovozda kurakda turmaydigan so‘zlar bilan haqorat qilib, atrofdagilar eʼtiborini tortgan holda xodimga nisbatan faol jismoniy qarshilik ko‘rsatgan.
Shundan so‘ng Milliy gvardiya xodimi o‘zini himoya qilish va huquqbuzarlikni bartaraf etish maqsadida kuch ishlatishga majbur bo‘lgan. Shunda, u yerda bo‘lgan fuqarolar holatga aralashib, nomaʼlum shaxsni ajratib olgan vaqtida huquqbuzarlik sodir etgan shaxs hodisa joyidan ketib qolgan.
Holat yuzasidan yig‘ilgan fuqarolarga Milliy gvardiya xodimi tomonidan batafsil tushuncha berilib, ularni voqea joyidan tarqatish choralari ko‘rilgan. Hozirda mazkur holat yuzasidan nomaʼlum shaxs tomonidan sodir etilgan Ma’muriy javobgarlik to‘g‘risidagi kodeksning 91-1-moddasi (Belgilanmagan joylarga qattiq maishiy chiqindilarni va qurilish chiqindilarini tashlash, shuningdek, suyuq maishiy chiqindilarni to‘kish), 194-1-moddasi (Milliy gvardiya harbiy xizmatchisining (xodimining) qonuniy talablarini bajarmaslik) va 195-1-moddasi (Milliy gvardiya harbiy xizmatchilarining (xodimlarining) o‘z xizmat burchlarini bajarishlariga qarshilik ko‘rsatish)da nazarda tutilgan maʼmuriy huquqbuzarliklari uchun qonuniy chora ko‘rish va uni qidirib topish choralari ko‘rilmoqda.
Avvalroq Toshkent viloyati hududida fuqaro IIB xodimlariga pichoq o‘qtalgani tasvirlangan video tarqalgandi. Toshkent viloyati Ichki ishlar bosh boshqarmasining mazkur voqea yuzasidan tushuntirish berishicha, u IIB xodimiga pichoq o‘qtalishidan avval 40 yoshli fuqaroning qorin sohasiga pichoq sanchib, unga tan jarohati yetkazgan.
Izoh (0)