Тошкент шаҳрининг Яккасарой туманида аёли билан жанжаллашиб қолган маст эркак уни тартибга чақирмоқчи бўлган ички ишлар ходимига ташланиб қолди, деб хабар беради пойтахт ИИББ ахборот хизмати.
Маълум қилинишича, эркак мазкур воқеа содир бўлган куни рафиқаси билан кафеда овқатланаётган бўлган. Улар ўртасида можаро юзага келган ва эр хотинини бир неча марта урган. Ташқарига қочиб чиққан аёл шу атрофда бўлган ички ишлар ходимидан ёрдам сўраган. Бундан жаҳли чиққан эр участка инспекторига синган шиша бўлаги билан ташланган.
Содир бўлаётган воқеадан хабар топган Миллий гвардия ходими фуқарони тартибга чақиришга уринган, бироқ маст ҳолда бўлган эркак унинг юзига шиша бўлаги билан жароҳат етказган. Фуқаронинг қаршиликларига қарамай, ёрдамга етиб келган Миллий гвардия ходимлари уни ички ишлар органларига топширган.
Аниқланишича, қонунбузар эркак бундан олдин ҳам бир неча марта судланиб, жазони ўтаб чиққан.
Мазкур ҳолат юзасидан Т.А.га нисбатан Жиноят кодексининг 277-моддаси (безорилик) 3-қисми «г» банди билан жиноят иши қўзғатилган. Ҳозирда қонунбузарга нисбатан қамоққа олиш эҳтиёт чораси қўлланилган.
Аввалроқ Тошкентда гаражининг бузилишига қаршилик кўрсатган аёлга қўпол муносабатда бўлган ИИБ ходимига хизмат текшируви тайинлангани, Наманганда фуқаро ИИБ ходими билан жанжаллашиб, унинг хизмат кийимидаги тугмаларни узиб ташлагани тўғрисида хабар берилганди.
Изоҳ (0)