Туркия президенти Ражаб Тоййиб Эрдўғон G20 саммитида барча етакчиларни, исроиллик-фаластинлик, яҳудий, мусулмон, христиан бўлишидан қатъи назар, тинч аҳоли ўлимига бир хил муносабатда бўлишга чақирди.
Эрдўғон Ғазода содир бўлаётган фожиа эндиликда инсониятнинг бағрикенглик чегарасидан ошиб кетганини айтди.
Икки кун олдин, 20 ноябрь – Халқаро болалар ҳуқуқини ҳимоя қилиш куни эди. Етти мингга яқин бегуноҳ фаластинлик бола, афсуски, бу кунни кўра олмади. Чунки Исроил маъмурияти бу болалар билан бирга 14 минг тинч аҳолининг асосий ҳуқуқи бўлган “яшаш ҳуқуқи”ни улардан тортиб олди.
Фаластинликларни ўз ватанидан кўчиб кетишларига мажбур қилди; Ўлимдан қутулиш учун сўнгги умид билан бошпана топган касалхоналари, мактаблари ва лагерларини шафқатсизларча бомбардимон қилди. Ҳатто бугунгача борлигини рад этган ядровий бомбаларини ишлатиш билан таҳдид қилиш даражасигача ўз назоратларини йўқотди, — деди Туркия президенти.
Сиёсатчи Исроил ва ҲАМАС ўртасида 4 кунлик гуманитар танаффус эълон қилиниши ҳамда оз бўлса-да, гаровга олинганлар ва маҳбусларни алмашиш ҳақидаги келишув ижобий ўзгариш эканини билдирди.
Охирги воқеалар билан бирга 1967 йил чегараларига асосланган, пойтахти Шарқий Қуддус бўлган мустақил Фаластин давлатини барпо этиш ва Исроил билан ёнма-ён тинч яшаш муҳимлигига барчамиз яна бир бор гувоҳ бўлдик. Шу нуқтаи назардан, сизларни икки давлат учун ечимни ўрнатиш учун ташаббус кўрсатишга чақираман, — деди у.
Шунингдек, Эрдўғон Туркия Ғазодаги ярадорларни, айниқса саратон касаллари ва болаларни Туркияга олиб кетиб даволашни давом эттиришини таъкидлади.
Изоҳ (0)