Туркия президенти Ражаб Тоййиб Эрдўғон Исроилни террорчи ташкилот деб атади ва Исроилнинг ҲАМАС билан уруш натижалари унинг фойдасига бўлмаслигини башорат қилди.
Шунингдек, Эрдўғон Исроил бош вазири Биньямин Нетаньяху мамлакат ядро қуролига эга ёки йўқлигини аниқлаштириши кераклигини таъкидлади.
“Мен аниқ айтаман: Исроил террорчи давлат”, — деди Туркия президенти парламентда ҳукмрон Адолат ва тараққиёт партияси фракцияси аъзолари олдида сўзлаган нутқида.
У Фаластиннинг ҲАМАС ҳаракати, аксинча, қонуний сиёсий куч эканлигини таъкидлади. “ҲАМАС сайловларда ғалаба қозонган сиёсий партиядир”, — деди Туркия президенти.
Бир кун аввал Туркия Бош прокуратураси Исроил бош вазирига нисбатан жиноят ишини Адлия вазирлигига юборган эди. Прокуратура уни геноцид амалга ошириш айби билан Халқаро жиноий судга беришни талаб қилмоқда. 4 ноябрь куни Эрдўғон Исроил бош вазири билан алоқани тўхтатганини эълон қилди. Шу куни Туркия Исроилдан элчисини чақириб олганди.
Изоҳ (0)