Туркия президенти Ражаб Тоййиб Эрдўғон Исроилнинг Ғазо секторидаги ҳаракатларини кескин танқид қилиб, Исроилга ташрифини бекор қилганини айтди. Бу ҳақда TRT Haber хабар берди.
Эрдўғон Туркия парламентида сўзлаган нутқида тегишли маълумотни етказди.
“Исроилга ташриф дастурим бор эди, уни бекор қилдим, ташриф бўлмайди”, — деди Ражаб Тоййиб Эрдўғон.
Туркия президенти Исроил ва бошқа давлатлар ҲАМАСни террорчи ташкилот деб атаётгани, бироқ ҲАМАС ўз заминини ҳимоя қилиш учун курашаётган озодлик ташкилоти эканини таъкидлади.
“7 октябрдан бери Исроил Ғазо секторида бегуноҳ одамларга қарши энг қонли ва жирканч портлашлардан бирини амалга оширмоқда. Ғазода ҳалок бўлганларнинг деярли ярми болалар, қолган ярми уларнинг оналари ва қариндошлари. Бу маълумотлар Исроил мақсади ўзини ҳимоя қилиш эмаслигини кўрсатади”, — деди Туркия президенти.
У Исроилнинг Ғазо секторидаги ҳаракатларини танқид қилиб, Анқара “Ғазода болаларнинг ўлдирилишига йўл қўймаслигини” таъкидлади. Унинг сўзларига кўра, Ғазо секторига ҳужум уюштирганлар ҳам, уни қўллаб-қувватлаганлар ҳам “руҳий касаллик” аломатларини кўрсатмоқда.
Эрдўғон Туркия Исроил билан муносабатларни ниҳоят нормаллаштириш ниятида бўлгани, бироқ Исроил турк томонининг “яхши ниятини суиистеъмол қилган” ва ўзаро жавоб қадами бўлмаганини билдирди.
Шунингдек, сиёсатчи АҚШ ютқазиши, чунки у Исроил билан “адолатга қарши” тураётганини айтди. Туркия президентининг фикрича, Ғарб “ҳақиқатдан юз ўгирган” ва “ғайриинсоний ҳужумлар” учун оқланиш изламоқда.
“Америка дунёнинг адолатли бошқарилишини истамайди, у ҳам ютқазади”, — дея қўшимча қилди у.
Бундан ташқари, сиёсатчи Россиянинг Украинага қарши урушида тинчлик тарафдори бўлган ва Ғазодаги қирғин ҳақида сукут сақлаётганларнинг хатти-ҳаракатларини иккиюзламачилик деб атади ва Ғарб давлатларини Исроилни қўллаб-қувватлаш номи билан “оловга мой қуйишда” айблади.
Изоҳ (0)