Туркия президенти Ражаб Тоййиб Эрдўғон Исроилнинг ҳужумларини сўзсиз қўллаб-қувватлаётган Ғарб давлатларини халқаро ҳуқуқни бузишда айблади. Бу ҳақда “ТАСС” хабар берди.
“Барча Ғарб давлатлари Исроил ҳужумларини сўзсиз қўллаб-қувватламоқда. Инсон ҳуқуқлари умумжаҳон декларациясига нима бўлди? Унда нима ёзилганига қарамайсизми?”, — деди Эрдўғон.
Сиёсатчи улар декларацияга ўзларига мос келгандагина қараши, акс ҳолда эса йўқлигини, Ғазодаги вазият иккинчи ҳолатга мос тушаётганини айтди.
“Чунки мусулмонлар қони тўкилмоқда. Улар ёрдам кемаси ўрнига самолёт ташувчи кема жўнатиб, қайси лоббига хизмат қилишларини кўрсатди. Бу иккиюзламачилик деб аталади”, — деди Туркия президенти.
Аввалроқ Эрдўғон Исроилнинг Ғазо секторидаги ҳаракатларини кескин танқид қилиб, Исроилга ташрифини бекор қилганини таъкидлаганди.
“7 октябрдан бери Исроил Ғазо секторида бегуноҳ одамларга қарши энг қонли ва жирканч портлашлардан бирини амалга оширмоқда. Ғазода ҳалок бўлганларнинг деярли ярми болалар, қолган ярми уларнинг оналари ва қариндошлари. Бу маълумотлар Исроил мақсади ўзини ҳимоя қилиш эмаслигини кўрсатади”, — деган Туркия президенти.
Шунингдек, у Исроилнинг Ғазо секторидаги ҳаракатларини танқид қилиб, Анқара “Ғазода болаларнинг ўлдирилишига йўл қўймаслигини” билдирган. Сиёсатчи ҲАМАС ўз заминини ҳимоя қилиш учун курашаётган озодлик ташкилоти эканини таъкидлаган.
Изоҳ (0)