Жиззах ва Фарғона вилоятларида яна кўмирни талон-торож қилиш ҳолатлари аниқланди

Жиззах ва Фарғона вилоятларида имтиёзли нархда сотиш учун ажратилган кўмирни талон-торож қилиш билан боғлиқ янги ҳолатлар аниқланди.

Бош прокуратура ҳузуридаги департаментнинг Шароф Рашидов туман бўлими ҳамда ДХХ ходимлари ҳамкорлигида тумандаги бир нечта аҳолининг мурожаатига асосан ўтказилган терговга қадар текширувда “Кўмир таъминот” МЧЖнинг Жиззах кўмир омбори масъул шахслари 1556 тонна кўмирни бошқа шахсларга сотиб, гўёки 765 тонна кўмир 160 та хонадонга имтиёзли нархда сотилгани тўғрисида сохта ҳужжатлар расмийлаштиргани аниқланган.

Департаментнинг Жиззах вилояти бошқармаси томонидан ДХХ ходимлари билан ҳамкорликда ўтказилган терговга қадар текширувда эса “Кўмир таъминот” МЧЖнинг Фориш кўмир омбори масъул шахслари ва бошқалар ўзаро тил бириктириб, куз-қиш мавсум учун гўёки 410 та хонадонга имтиёзли нархда кўмир сотилгани тўғрисида сохта ҳужжатларни расмийлаштириб, жами 1041 тонна кўмирни ўзлаштириш йўли билан талон-торож қилгани аниқланган.

Шу каби, Департаментнинг Фарғона тумани бўлими томонидан ўтказилган терговга қадар текширувда “Кўмир таъминот” МЧЖнинг Қувасой кўмир омбори мудири Э.У. ва бошқалар ўзаро тил бириктириб, имтиёзли нархларда аҳолига сотиш учун ажратилган 1284 тонна кўмирни бошқа шахсларга бозор нархида сотиб юбориб, ўзлаштириш йўли билан талон-торож қилгани аниқланган.

Мазкур ҳолатлар юзасидан Жиноят кодексининг тегишли моддалари билан кўмир омбори масъул шахсларига нисбатан тергов ҳаракатлари олиб борилмоқда.