Jizzax va Farg‘ona viloyatlarida yana ko‘mirni talon-toroj qilish holatlari aniqlandi

Jizzax va Farg‘ona viloyatlarida imtiyozli narxda sotish uchun ajratilgan ko‘mirni talon-toroj qilish bilan bog‘liq yangi holatlar aniqlandi.

Bosh prokuratura huzuridagi departamentning Sharof Rashidov tuman bo‘limi hamda DXX xodimlari hamkorligida tumandagi bir nechta aholining murojaatiga asosan o‘tkazilgan tergovga qadar tekshiruvda “Ko‘mir ta’minot” MCHJning Jizzax ko‘mir ombori mas’ul shaxslari 1556 tonna ko‘mirni boshqa shaxslarga sotib, go‘yoki 765 tonna ko‘mir 160 ta xonadonga imtiyozli narxda sotilgani to‘g‘risida soxta hujjatlar rasmiylashtirgani aniqlangan.

Departamentning Jizzax viloyati boshqarmasi tomonidan DXX xodimlari bilan hamkorlikda o‘tkazilgan tergovga qadar tekshiruvda esa “Ko‘mir ta’minot” MCHJning Forish ko‘mir ombori mas’ul shaxslari va boshqalar o‘zaro til biriktirib, kuz-qish mavsum uchun go‘yoki 410 ta xonadonga imtiyozli narxda ko‘mir sotilgani to‘g‘risida soxta hujjatlarni rasmiylashtirib, jami 1041 tonna ko‘mirni o‘zlashtirish yo‘li bilan talon-toroj qilgani aniqlangan.

Shu kabi, Departamentning Farg‘ona tumani bo‘limi tomonidan o‘tkazilgan tergovga qadar tekshiruvda “Ko‘mir ta’minot” MCHJning Quvasoy ko‘mir ombori mudiri E.U. va boshqalar o‘zaro til biriktirib, imtiyozli narxlarda aholiga sotish uchun ajratilgan 1284 tonna ko‘mirni boshqa shaxslarga bozor narxida sotib yuborib, o‘zlashtirish yo‘li bilan talon-toroj qilgani aniqlangan.

Mazkur holatlar yuzasidan Jinoyat kodeksining tegishli moddalari bilan ko‘mir ombori mas’ul shaxslariga nisbatan tergov harakatlari olib borilmoqda.