Андижон ва Сирдарё вилоятларида аҳолига имтиёзли нархда етказиб бериш учун ажратилган кўмирни талон-торож қилиш ҳолатлари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Избоскан туман бўлими томонидан терговга қадар текширув ўтказилган. Текширувда “Кўмир таъминот” МЧЖнинг Избоскан кўмир омбори масъул шахслари аҳолига имтиёзли нархда етказиб бериш учун ажратилган 1007,9 тонна кўмирни 303 сўмдан сотилгани тўғрисида сохта ҳужжатлар расмийлаштириб, амалда ушбу кўмирни бошқа шахсларга сотиб юбориб, ўзлаштириш йўли билан талон-торож қилгани аниқланган.
Худди шундай, департаментнинг Пахтаобод туман бўлими томонидан ўтказилган терговга қадар текширувда “Кўмир таъминот” МЧЖнинг Пахтаобод кўмир омбори масъул шахслари аҳолига имтиёзли нархда етказиб бериш учун ажратилган 873,2 тонна кўмирни 303 сўмдан сотилгани тўғрисида сохта ҳужжатлар расмийлаштириб, амалда ушбу кўмирни бошқа шахсларга сотиб юбориб, ўзлаштириш йўли билан талон-торож қилган.
Шу каби, департаментнинг Сайхунобод туман бўлими томонидан ўтказилган терговга қадар текширувда “Кўмир таъминот” МЧЖнинг Бахт кўмир омбори масъул шахслари ва бошқалар ҳудуддаги 7 та маҳаллада яшовчи аҳолига имтиёзли нархда кўмир сотилгани тўғрисидаги ҳужжатларга сохта маълумотлар киритиб, 464,6 тонна кўмирни бошқа шахсларга нақд пулга сотиб юбориб, ўзлаштириш йўли билан талон-торож қилгани маълум бўлди.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Андижоннинг Андижон, Булоқбоши, Жалақудуқ туманларида аҳолига ажратилган кўмирни талон-торож қилган омбор мудирлари қўлга олингани тўғрисида хабар берилганди.
Изоҳ (0)