Андижоннинг уч туманида аҳолига ажратилган кўмирни талон-торож қилган омбор мудирлари қўлга олинганди. Наманган ва Фарғонада ҳам шундай жиноятни содир этган омбор мудирлари ушланди. Бу ҳақда Бош прокуратура матбуот хизмати хабар берди.
Тарқатилаётган кўмирнинг аҳолига етиб бориши юзасидан прокуратура органлари томонидан ўтказилаётган назорат тадбирларининг бирида “Кўмир таъминот” МЧЖнинг Наманган вилоят филиали тасарруфидаги Учқўрғон тумани кўмир омбор мудири У.Н. куз-қиш мавсумида аҳолига имтиёзли нархда тарқатишга мўлжалланган 623,7 тонна кўмирларни талон-торож қилгани аниқланган.
Фарғонадаги ҳолатда эса “Кўмир таъминот” МЧЖнинг Фарғона вилояти филиали тасарруфидаги Бувайда туман кўмир омбор мудири А.И. куз-қиш мавсумида аҳолига имтиёзли нархда тарқатишга мўлжалланган 413,8 миллион сўмлик 1364,3 тонна кўмирларни гўёки фуқаролар олгани тўғрисида сохта маълумотлар тайёрлаб, кўмирни нақд пулга сотиб, шахсий манфаатлари йўлида талон-торож қилган.
Ҳар икки ҳолат юзасидан жиноят иши қўзғатилиб, омбор мудирлари процессуал тартибда ушланган. Тергов ҳаракатлари давом этмоқда.
31 октябрь куни президент томонидан энергетика тизимини куз-қиш мавсумига тайёрлаш бўйича вазифалар ижроси юзасидан ўтказилган йиғилишда айрим ҳудудларда аҳолига кўмир тарқатиш тизими тўғри йўлга қўйилмагани, оқибатда етказиб берилган кўмирни юқори нархларда ноқонуний сотиб юбориш ва талон-торож қилиш ҳолатларига йўл қўйилаётгани кўрсатиб ўтилган ва Бош прокуратурага тарқатилаётган кўмирнинг аҳолига етиб боришини назорат қилиш бўйича тизим яратиш топширилганди.
Мазкур топшириқ ижроси юзасидан Бош прокуратуранинг ишчи гуруҳи томонидан ҳудудларда мунтазам равишда назорат тадбирлари ўтказилмоқда.
Изоҳ (0)