Андижоннинг Анджон, Булоқбоши, Жалақудуқ туманларида аҳолига ажратилган кўмирни талон-торож қилган омбор мудирлари қўлга олинди. Бу ҳақда вилоят прокуратураси матбуот хизмати хабар берди.
Маълум қилинишича, “Кўмир таъминот” МЧЖнинг Андижон вилояти филиали тасарруфидаги Андижон тумани кўмир омбор мудири Ш.Б. куз-қиш мавсумида аҳолига имтиёзли нархда тарқатишга мўлжалланган 362,3 миллион сўмлик 1,220 тонна, шу каби, Булоқбоши тумани кўмир омбор мудири С.Н. 178,3 миллион сўмлик 445,5 тонна ҳамда Жалақудуқ тумани кўмир омбор мудири Й.Ю. 421,7 миллион сўмлик 1,419,9 тонна кўмирни гўёки фуқаролар олгани тўғрисида сохта маълумотлар тайёрлаб, нақд пулга сотиб юбориб, шахсий манфаатлари йўлида талон-торож қилган.
Мазкур ҳолатлар юзасидан юқоридаги омбор мудирларига нисбатан Жиноят кодексининг 167-моддаси 3-қисми “а ” банди (ўзлаштириш ёки растрата йўли билан жуда кўп миқдорда талон-торож қилиш) ва бошқа моддалари билан жиноят ишлари қўзғатилиб, ушбу шахслар Жиноят-процессуал кодексининг 221-моддаси тартибида ушланган.
Жиноят ишлари юзасидан дастлабки тергов ҳаракатлари вилоят прокуратураси томонидан олиб борилмоқда.
Изоҳ (0)