Жиззах вилояти Зарбдор туманида аҳолига имтиёзли нархда сотиш учун ажратилган кўмирни талон-торож қилиш ҳолати аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Жиззах вилоят бошқармаси томонидан терговга қадар текширув ўтказилган. Текширувда “Кўмир таъминот” МЧЖнинг Зарбдор кўмир омбори мудири Б.Б. ва бошқалар аҳолига имтиёзли нархда сотиш учун ажратилган 2 346 тонна кўмирни гўёки тумандаги 851 та хонадонга имтиёзли нархда сотилгани тўғрисида сохта ҳужжатларни расмийлаштириб, амалда кўмирни қиммат нархларда бошқа шахсларга нақд пулга сотиб, талон-торож қилганликлари аниқланган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Бундан олдин Андижоннинг Андижон, Булоқбоши, Жалақудуқ туманларида аҳолига ажратилган кўмирни талон-торож қилган омбор мудирлари қўлга олингани тўғрисида хабар берилганди.
Изоҳ (0)