Боливия ҳукумати Ғазо секторидаги амалиёт туфайли Исроил билан дипломатик муносабатларни узганини эълон қилди. Бу ҳақда Reuters хабар берди.
Боливия Ташқи ишлар вазири ўринбосари Фредди Мамани тегишли қарор “Исроилнинг Ғазо секторида давом этаётган агрессив ва номутаносиб ҳарбий ҳужумини рад этиш ва қоралаш белгиси” сифатида қабул қилинганини айтди.
Жанубий Американинг яна икки давлати: Чили ва Колумбия Исроилдан ўз элчиларини маслаҳатлашув учун чақириб олди. Учала давлат ҳам сулҳ тузишга чақирди. Боливия ва Чили ҳукумати Ғазо секторига инсонпарварлик ёрдами етказилишини таъминлаш зарурлигини билдирди, шунингдек, Исроилни халқаро ҳуқуқни бузганликда айблади.
Мексика ва Бразилия ҳукумати ҳам сулҳ зарурлигини эълон қилди. Исроил Ташқи ишлар вазирлиги ҳозирча Чили ва Колумбия элчиларининг чақириб олиниши, шунингдек, Боливиянинг дипломатик алоқаларни узгани ҳақидаги баёнотига изоҳ бермади.
Боливия Ғазо секторидаги операция туфайли Исроил билан дипломатик муносабатларни узганини эълон қилган дунёдаги биринчи давлат бўлди. 2009 йилда Боливиянинг ўша пайтдаги президенти бўлган Эво Моралес ҳам Ғазо секторига қилинган ҳужумлар туфайли Исроил билан дипломатик алоқаларини узганди, бироқ у 2020 йилда тикланган.
- 7 октябрь куни ҲАМАС Исроилга ҳужум қилиши оқибатида 1400 киши ҳалок бўлди, гуруҳ 200 дан ортиқ одамни гаровга олди. Бунга жавобан Исроил армияси Ғазо секторига ҳаво ҳужумларини бошлади ва октябрь ойи охирида Исроил мудофаа кучлари қўшинлари Фаластин ҳудудига кириб келди.
- Фаластин томонига кўра, 7 октябрдан бери Ғазо секторида 8,5 мингга яқин одам ҳалок бўлган, улардан 3,5 минг нафари болалар. Ғазо секторидаги 1,5 миллионга яқин аҳоли, БМТ расмийларининг айтишича, уйларини ташлаб кетишга мажбур бўлган.
Изоҳ (0)