Баҳрайн ўз элчисини Исроилдан чақириб олди ва яҳудий давлати билан иқтисодий алоқаларини узди. Бу ҳақда Баҳрайн Вакиллар кенгашига таяниб, Arab News хабар берди.
“Бу қирол олий ҳазратлари барча конференция ва тадбирларда таъкидлаганидек, биродар Фаластин халқининг қонуний ҳуқуқларини қўллаб-қувватлаш борасида Баҳрайннинг мустаҳкам тарихий позицияси тасдиғидир”, — деди қонунчилар.
Исроилнинг Баҳрайндаги элчиси ҳам қиролликни тарк этган.
“Жанговар ҳаракатларни давом эттириш, халқаро гуманитар қонунларга риоя қилмаслик нуқтаи назаридан Исроилнинг давом этаётган эскалацияси Баҳрайнни Фаластин тинч аҳолисининг ҳаётини сақлаб қолишга қаратилган кўпроқ қарорлар ва чоралар кўришга мажбур қилмоқда”, — дейилади баёнотда.
Баҳрайн 2020 йилда араб дунёси давлатлари ва Тель-Авив ўртасидаги муносабатларни яхшилаш мақсадида АҚШ ташаббуси билан тузилган Иброҳим келишувлари доирасида Исроил билан дипломатик муносабатлар ўрнатган.
Аввалроқ минтақадаги вазият ёмонлашгани сабабли Иордания, Колумбия ва Чили Исроилдан ўз элчиларини чақириб олган, Боливия эса яҳудий давлати билан алоқаларини узганини эълон қилганди.
Изоҳ (0)