Россия Давлат думаси вице-спикери Пётр Толстой рус тили давлат тили бўлмаган мамлакатлар фуқаролари Россияда ҳайдовчи, сотувчи ва курьер бўлиб ишламаслиги кераклигини айтди. Бу ҳақда “Взгляд.ру” хабар берди.
Толстой Федерация Кенгашидаги тингловда постсовет ҳудудидаги мамлакатларда рус тилини ўқитиш масаласини кўтариб, республикаларда инглиз тилини ўрганишга устунлик берилаётгани, рус тилини миллий тиллар билан сиқиб чиқаришга ҳаракат қилинаётганини айтди.
У хорижликларнинг Россияда хизмат кўрсатиш соҳасида ишлашини тақиқлаш орқали бу ҳолатга қонунчилик таъсирини ўтказиш мумкинлигини билдирди.
“Агар рус тили давлат тили бўлмаса, кечирасиз, бу мамлакатлар фуқаролари бизнинг жамоат жойларида — ҳайдовчи, сотувчи, курьер бўлиб ишламаслиги керак. Бундай чора-тадбирлар аста-секин вазиятни тўғрилайди”, — деди у.
Толстойнинг таъкидлашича, “юмшоқ кучнинг бир қисми маълум нарсаларга қўйилиши керак бўлган чекловлардир”.
Изоҳ (0)