Россияда 2022 йилда ташкил этилган “Россиялик ўқитувчи хорижда” номли лойиҳа доирасида Тожикистон умумтаълим мактабларида дарс бераётган рус ўқитувчиларининг сони 75 нафарга етди. Бу ҳақда “Дарё”нинг Тожикистондаги мухбири хабар берди.
Гуманитар дастур асосида йўлга қўйилган ушбу лойиҳада Тожикистон биринчилардан бўлиб иштирок этди. Натижада мамлакат пойтахтидаги 22 та мактаб ҳамда Тожикистоннинг бошқа шаҳар ва туманларидаги умумтаълим мактабларда россиялик ўқитувчилар ишлаш учун жалб этилди. Россиянинг турли минтақаларидан келган ўқитувчилар асосан рус тили ва адабиётидан дарс бермоқда.
Хорижлик ўқитувчиларнинг оилалари ётоқхоналар билан таъминланган ва уларнинг йўл харажатлари ҳам тўланади. Телевизор ва кир ювиш машинаси каби уй-рўзғор буюмларига эҳтиёж сезилса, лойиҳа асосида улар дарҳол сотиб олинади.
Мазкур лойиҳанинг муваффақиятли ишлаётгани боис россиялик ўқитувчиларнинг сони Тожикистонда ҳозиргача уч бараварга ошган. Дастлаб уларнинг сони 25 нафар эди. Бу ўқитувчилар ҳам Россия, ҳам Тожикистондан маош олади. Улар Россия элчихонаси ва “Россотрудничество” ширкати орқали бу лойиҳага жалб этилган.
Ҳозирги вақтда рус ўқитувчилари нафақат Душанбе шаҳри, балки Хўжанд, Кўлоб, Boxтар ва Хоруғ шаҳарларида ҳам меҳнат қилиб, рақобат йзага келишига сабабчи бўлмоқда.
Чорёр Авлиёзода, Душанбе
Изоҳ (0)