“Ғазода қилганларимизни Ливанда ҳам қила оламиз” — Исроил “Ҳизбуллоҳ”га таҳдид қилди

Сўнгги пайтларда Исроил ва Ливан ўртасида кенг кўламли уруш хавфи ортди. Бу ҳақда Исроил расмийларига таяниб, The Wall Street Journal хабар берди.

Маълум қилинишича, жанубий Ливандан яҳудий давлатига ҳужумлар “Ҳизбуллоҳ” Исроил ҳудудини ўққа тутишни кучайтиришга тайёрлигидан далолат беради. Исроил расмийлари бундай ҳужумларга жавоб қайтаришга шайлигини билдирмоқда.

Исроил мудофаа вазири Йоав Галантнинг айтишича, ливанликлар Ғазо сектори аҳолиси билан бир хил вазиятга тушиб қолиши мумкин.

Ливан фуқароларига мурожаат қиламан: Ғазода қирғоқ бўйлаб оқ байроқлар билан юриб, жанубга қараб ҳаракат қилаётган фуқароларни кўрмоқдаман. “Ҳизбуллоҳ” ҳаракати ҳам хатога йўл қўйиб, Ливанни урушга торца, ливанликлар ҳам худди шундай вазиятга тушиб қолиши мумкин. Агар “Ҳизбуллоҳ” шундай хатога йўл қўйса, бунинг учун биринчи навбатда Ливан фуқаролари товон тўлаши керак бўлади. Ғазода қилганимизни Байрутда ҳам қандай қилишни биламиз, — дея қўшимча қилди у.

Ливан-Исроил чегарасида Исроил армияси ва “Ҳизбуллоҳ” ўртасида тўқнашувлар 8 октябрь куни бошланган. “Ҳизбуллоҳ” сафидаги йўқотишлар 70 кишини, Исроил армиясидаги йўқотишлар тўрт кишини ташкил этмоқда.