АҚШ Сенати 7 ноябрь, сешанба куни Исроилга Фаластиннинг ҲАМАС ташкилотига қарши курашида Украинага бир вақтнинг ўзида кўмак кўрсатмасдан ёрдам бериш учун 14,3 миллиард доллар ажратиш ҳақидаги қонун лойиҳасини блоклади.
Агар Сенат қонун лойиҳасини маъқуллаганида, у АҚШ президенти Жо Байденга имзолаш учун тақдим этилган бўларди, бироқ Оқ уй Байден икки палатада овоз беришдан ўтган тақдирда ҳам ҳужжатга вето қўйиши ва имзоламаслиги ҳақида олдиндан огоҳлантирган эди.
Вакиллар палатаси республикачилари томонидан 30 октябрда илк бор тақдим этилган қонун лойиҳаси палата янги спикери Майк Жонсон давридаги биринчи йирик қонунчилик ташаббуси ҳисобланади. Унинг моҳияти фақат Исроилга ёрдам кўрсатиш, жумладан, Исроилнинг “Темир гумбаз” ва “Довуд чопони” ҳаво мудофаа тизимларини сотиб олиш учун 4 миллиард доллар, шунингдек, “Темир нур” тизимини ривожлантириш учун 1,2 миллиард доллар ажратишдан иборат эди.
Қонун лойиҳаси тақдим этилганида у америкалик сенаторлар танқидига учраган эди. 31 октябрь куни Сенатдаги республикачилар етакчиси Митч Макконнелл қонун лойиҳасига тўртта ҳудуд — Украина, Исроил, Тайван ва АҚШнинг Мексика билан чегарасига тегишли чораларни киритиш зарурлигини таъкидлади.
Ўз навбатида Сенатдаги демократлар етакчиси Чак Шумер Вакиллар палатасига тақим этилган қонун лойиҳасини “жиддий бўлмаган таклиф”, деб атади.
Аввалроқ The New York Times газетаси Жо Байден маъмурияти Украина ва Исроилга таъсир ўтказиш бўйича уринишларида қийинчиликларга дуч келаётгани ҳақида ёзганди. Байден маъмурияти Исроил бош вазири Биньямин Нетаньяхуни Ғазони бомбардимон қилишда “гуманитар пауза” қилишга кўндирмоқчи. Оқ уй Американинг Исроилга ёрдами Нетаняху Вашингтон маслаҳатига қулоқ тутишига кафолат бўлишига умид қилган. Бироқ бу содир бўлмади.
Изоҳ (0)