Германия ҳукумати узоқ давом этган тортишувлардан сўнг, қочқинларни жойлаштириш ва сақлаш харажатларини тақсимлашнинг янги тартибини келишиб олди. Берлинда ўтказилган йиғилишда 2024 йилдан бошлаб федерал марказ ер эгаларига пул тўлайди.
Қайд этилишича, бошпана изловчилар Германияда 36 ой яшаганидан кейин имтиёзларга эга бўлади. Аввал бу муддат 18 ойга тенг эди. Шу билан бирга, оиласиз қочқинлар учун бериладиган нафақа миқдори ойига 92 еврога туширилади, бепул тиббий хизматлар ҳажми ҳам қисқаради.
Алоҳида тоифадаги украиналик қочқинлар ва Германия ҳимояси остидаги бошқа мигрантлар агар 36 ойдан кейин ҳам маҳаллий ҳокимият томонидан тақдим этилган ётоқхоналарда яшаса, озиқ-овқат учун пулни фақат “керакли миқдорда” олади.
Федерал ҳукумат ҳар бир қочқинни қўллаб-қувватлаш учун йилига 7,5 минг евро сарфлашни режалаштирмоқда. Гап ётоқхоналар, озиқ-овқат ва қочқинларни қабул қилиш ва жойлаштириш билан боғлиқ бошқа харажатлар ҳақида кетмоқда.
Германия ҳукуматига кўра, мазкур чора-тадбирлар натижасида ерлар ва коммуналар 1 миллиард евро тежаб қолади. Мамлакат молия вазири Кристиан Линднернинг таъкидлашича, бу қисқартиришлар нафақат федерал ва маҳаллий ҳокимиятлар учун маблағни тежайди, балки мигрантлар учун “Германиянинг ижтимоий давлат сифатидаги жозибасини пасайтиради”.
Сентябрь бошларида Германияда яшовчи бошқа мамлакатлардан қочиб келганлар сони сўнгги ўн йилликларда энг юқори даражага етгани тўғрисида хабар берилганди. Июнь ойи охирига келиб хорижликлар марказий реестрида 3,26 миллион киши қочқинлар рўйхатига киритилган, бу 2022 йил охирига нисбатан 111 минг кишига кўп.
Изоҳ (0)