БМТ Бош котиби вакили Стефан Дюжаррик Исроил ва Фаластин ўртасидаги зиддият туфайли Ғазо секторининг 1,5 миллионга яқин аҳолиси ўз уйларини ташлаб кетишга мажбур бўлганини маълум қилди.
“Ғазода ҳалигача электр йўқ. 1,5 миллионга яқин одам ўз уйини ташлаб кетишга мажбур бўлди, 700 мингдан ортиқ киши назорат қилинмайдиган жойлардан бошпана топди. Ушбу объектларнинг 150 тасида ўз имкониятларидан ортиқча одам тўпланган”, — дейди Дюжаррик.
Ғазо секторидаги қарама-қаршилик шу йилнинг 7 октябрь куни бошланган эди. Шу куни эрталаб ҲАМАС Исроилга қарши “Ал-Ақса тўфони” деб номланган ҳарбий операция бошлади ва ҳаводан зарбалар берган.
Шундан сўнг Исроил бош вазири Биньямин Нетаньяху мамлакат уруш ҳолатида эканини эълон қилди. Мамлакат мудофаа кучларининг жавоб операцияси “Темир қилич” деб аталган. Сўнгги маълумотларга кўра, Исроил армиясининг Ғазо секторига уюштирган ҳужумлари оқибатида камида 10 022 киши ҳалок бўлган.
Изоҳ (0)