АҚШ президенти Жо Байден Исроил бош вазири Биньямин Нетаньяху билан 6 ноябрь куни ўтказган мулоқотида ҲАМАС томонидан қўлга олинган асирларни озод этиш учун уни Ғазода ўт очишни уч кунга тўхтатиб туришга чақирди. Бу ҳақда Axios ўз манбаларига таяниб хабар берди.
Нашр маълумотларига кўра, АҚШ, Исроил ва Қатар муҳокама қилаётган режада келтирилишича, ҲАМАС гаровга олинган 10-15 асирни озод этади ва 7 октябрда қўлга олинган одамларнинг аниқ рўйхати шакллантирилади.
Манбаларнинг қайд этишича, Нетанхаю Байденга бундай вариантга қарши эканини, чунки ҲАМАСга ишонмаслигини ва улар битимнинг ўзига тегишли қисмини бажармаслигини билдирган.
7 ноябрь куни Исроил халқига мурожаат йўллаган Нетаняху яна бир бор ўт очишга рози бўлмаслигини ва ҲАМАС барча асирларни озод этмагунча Ғазо секторига ёнилғи етказилишига рухсат бермаслигини маълум қилди.
Исроил президенти Исъҳоқ Герцог АҚШ вице-президенти Камала Харрис билан бўлиб ўтган суҳбатда ҳам шундай позицияни айтган. Исроил маълумотларига кўра, ҲАМАС 240 га яқин одамни асирликда ушлаб турибди.
Аввалроқ The New York Times газетаси Жо Байден маъмурияти Украина ва Исроилга таъсир ўтказиш бўйича уринишларида қийинчиликларга дуч келаётгани ҳақида ёзганди. Байден маъмурияти Исроил бош вазири Биньямин Нетаньяхуни Ғазони бомбардимон қилишда “гуманитар пауза” қилишга кўндирмоқчи. Оқ уй Американинг Исроилга ёрдами Нетаняху Вашингтон маслаҳатига қулоқ тутишига кафолат бўлишига умид қилган. Бироқ бу содир бўлмади.
Изоҳ (0)