Халқ депутатлари Шеробод тумани кенгашининг навбатдан ташқари сессиясида ташкилий масала кўриб чиқилди, деб хабар беради Сурхондарё вилояти ҳокимлиги матбуот хизмати.
Сессияда туман ҳокими лавозимида ишлаб келган Зайнобиддин Халилов соғлиги туфайли ўз аризасига кўра вазифасидан озод этилгани маълум қилинган. Унинг ўрнига Усмон Алимов туман ҳокими вазифасини бажарувчи этиб тасдиқланган.
Усмон Алимов 1983 йил 6 апрелда Денов туманида туғилган. 2007 йил ва 2014 йилда Термиз давлат университетини, 2021 йилда Президент ҳузуридаги давлат бошқарув академиясини тугатган. Маълумоти бўйича мутахассислиги – миллий истиқлол ғояси ҳуқуқ ва маънавият асослари, иқтисодиёт, давлат бошқаруви.
Усмон Алимов 2013-2019 йилларда вилоят ҳокимлигида турли вазифаларда ҳамда Узун тумани ҳокимининг биринчи ўринбосари лавозимларида фаолият юритган. 2019 йилдан буён Сурхондарё вилояти статистика бошқармаси бошлиғи лавозимида ишлаб келаётган эди.
Зайнобиддин Халилов шу йилнинг январь ойида Шеробод тумани ҳокими лавозимига тасдиқланган эди. У 2006-2022 йилларда монополия, қурилиш вазирлиги, рақобат қўмитаси, ҳисоб палатасида турли лавозимларда фаолият юритган. 2022 йилдан буён Ҳисоб палатасининг шўба мудири лавозимида ишлаб келган.
Аввалроқ Қишлоқ хўжалиги вазири ўринбосари Сайхунобод тумани ҳокими этиб тайинлангани тўғрисида хабар берилганди. Шунингдек, вазир ўринбосари Нишон туманига, Нишон ҳокими эса Муборак туманига ҳоким бўлди, Деҳқонобод ҳокими Зоир Алиқулов Қарши тумани ҳокими сифатида иш бошлади.
Изоҳ (0)