Исроил мудофаа кучлари Ғазо секторидаги Жабалия қочқинлар лагерига икки кун ичида иккинчи марта авиазарба берди. Камида 80 киши ҳалок бўлди, деб хабар бермоқда CNN.
CNN Ғазодаги Индонезия касалхонаси директори доктор Атеф ал-Каҳлутга таяниб, қурбонлар сони камида 80 кишини ташкил этгани, яна бир неча юз қочқин яраланганини маълум қилди.
Ўз навбатида, Sky News Arabia нашри Жабалиядаги лагерга берилган зарба оқибатида 195 киши ҳалок бўлганини ёзмоқда. Унга кўра, яна 777 киши яраланган.
Исроил томони зарба нишони тинч аҳоли эмас, балки “аниқ разведка маълумотлари” асосида ўлдирилган ҲАМАС жангчилари бўлганини даъво қилмоқда. Аввалроқ Исроил армияси ҲАМАСни ўз ҳарбий объектларини шифохоналар ва қочқинлар лагерлари ёнига жойлаштиришда бир неча бор айблаган.
“ҲАМАС ўз инфратузилмасини атайлаб тинч аҳоли нишонлари остига, яқинига ёки устига қурмоқда, бу Ғазо фуқароларининг ҳаётини атайлаб хавф остига қўймоқда”, — дейилади Исроил армияси баёнотида.
31 октябрда Исроилнинг Ғазо шимолидаги Жабалия қочқинлар лагерига уюштирган ҳужумида 50 дан ортиқ одам ҳалок бўлгани, 150 дан ортиқ киши жароҳатлангани хабар қилинганди.
Изоҳ (0)