Isroil G’azodagi eng yirik qochqinlar lageriga aviazarba berdi. 50 ga yaqin odam halok bo‘ldi (video)

Isroilning G‘azo shimolidagi Jabaliya qochqinlar lageriga uyushtirgan havo hujumida o‘nlab odamlar halok bo‘ldi. Bu haqda Al Jazeera xabar berdi.

G‘azodagi sog‘liqni saqlash vazirligi hujumda 50 dan ortiq odam halok bo‘lgani, 150 dan ortiq kishi jarohatlanganini ma’lum qildi. Voqea joyidan olingan suratlar va videolarda qutqaruvchilar va ko‘ngillilar katta miqdordagi beton qoldiqlari ichidan omon qolganlarni qidirayotganini ko‘rish mumkin.

Isroilning turar joy hududini nishonga olishi oqibatida 20 ta uy butunlay vayron bo‘lgan. Isroil mudofaa kuchlari matbuot kotibi podpolkovnik Richard Xet zarbani Isroil harbiylari amalga oshirganini tasdiqladi. Uning so‘zlariga ko‘ra, hujum nishoni HAMAS qo‘mondoni bo‘lgan.

Isroil armiyasi matbuot kotibi Daniel Hagarining matbuot anjumanida aytishicha, isroillik harbiylar HAMAS qo‘mondonlaridan biri Ibrohim Biariyni Jabaliyaga zarba berish chog‘ida “yo‘q qilishga muvaffaq bo‘lgan”.

 

Biariy joylashgan binoga qilingan hujum “boshqa obyektlarning qulashiga olib kelgan, chunki u yerda juda keng infratuzilma mavjud edi”, — deya uning so‘zlarini keltiradi The Guardian.