Украина Қуролли кучлари бош қўмондони Валерий Залужний Британиянинг Тhе Economist газетаси учун ёзган мақоласида Россия ва Украина ўртасидаги можаро ҳаракат ва тезликни ўз ичига олган манёврли урушни эмас, балки статик ва тинкани қуритувчи жанглар билан янги позицион уруш босқичига ўтаётганини айтди.
Залужнийнинг қайд этишича, позицион уруш Россия учун фойдали ва унга ўз кучини тиклаш имкониятини беради, бу эса пировардида нафақат Украина Қуролли кучларига, балки давлат сифатида Украинанинг ўзига ҳам таҳдид солади. Унинг фикрича, ғалаба қозониш учун Украинага муҳим ҳарбий имкониятлар ва технологиялар керак.
Украина Қуролли кучлари Бош қўмондони маълум қилишича, позицион уруш тузоғидан чиқиш учун Украинага
- ҳаво устунлигига эришиш;
- электрон уруш имкониятларини мустаҳкамлаш;
- душман артиллериясига зарбалар сонини кўпайтириш (контрбатареяли кураш);
- янги миналарни тозалаш технологияларини жорий этиш;
- ўқитиш ва сафарбарликка чақирилиши мумкин бўлган Украина фуқаролари тоифаларини кенгайтириш кабилар керак.
“Россияга паст баҳо бермаслик лозим. У катта йўқотишларга учради ва жуда кўп ўқ-дориларни сарфлади. Аммо у узоқ вақт давомида қурол-яроғ, жиҳозлар, ракеталар ва ўқ-дорилар бўйича устунлик қила олади. Унинг мудофаа саноати мисли кўрилмаган санкцияларга қарамай ишлаб чиқаришни оширмоқда.
Позицион уруш — бу Украина Қуролли кучлари ва давлати учун жуда катта хавф-хатарларни олиб келадиган узоқ муддатли уруш. Янги, инновацион ёндашувларгина ушбу позицион урушни манёврлар урушига айлантириши мумкин”, — деди Залужний.
Ҳарбий экспертларнинг фикрига кўра, ўтган йилги муваффақиятлардан фарқли равишда бу ёзда Украина қарши ҳужум пайтида ўз ерларни озод қилишда катта натижаларга эриша олмади. Бироқ украиналиклар Қримдаги рус ҳарбий кучларини заифлаштирди ва рус флотини Қора денгиз ғарбий қисмидан чиқариб юборишга эришди.
Украина президенти Владимир Зеленский, Украина Қуролли кучлари бош қўмондони Валерий Залужний ва мамлакат ҳарбий раҳбариятига кўра, Россияга жавоб беришдан асосий мақсад — Украинанинг барча эгаллаб олинган ҳудудларини озод қилиш ва 1991 йилги чегараларга қайтиш.
Изоҳ (0)