Исроил ҲАМАС гуруҳининг ҳарбий ва сиёсий салоҳиятини мунтазам равишда йўқ қилишда давом этмоқда; биринчи босқич уларнинг ҳужумини тўхтатишни, иккинчиси — уларга авиазарбалар беришни ўз ичига олди. Бу ҳақда Исроил бош вазири Биньямин Нетаньяху матбуот анжуманида маълум қилди.
“Учинчи босқич — Ғазо секторига қуруқликдан бостириб киришни кенгайтириш. Исроил армияси буни ўлчовли, жуда кучли қадамлар билан амалга оширмоқда, тизимли равишда босқичма-босқич ҳаракат қилмоқда”, — деди Нетаняху.
У Ливаннинг “Ҳизбуллоҳ” гуруҳига яна мурожаат қилиб, Исроил шимолий чегарани мустаҳкамлаш устида иш олиб бораётганини таъкидлади ва бу гуруҳ жангга “тўлиқ қўшилишга қарор қилса, бир умрлик хатога йўл қўйиши” ҳақида огоҳлантирди.
“Сиз тасаввур ҳам қила олмайдиган зарбани оласиз”, — деб ваъда берди Исроил бош вазири.
У, шунингдек, агар ҲАМАС мағлуб бўлмаса, “ёвузлик ўқи ғалаба қозонишини” ва Ғарб давлатлари ҳам, бутун араб дунёси ҳам мағлуб бўлишини даъво қилди.
7 октябрь кунги ҲАМАС ҳужумидан сўнг Исроил Ғазо секторидаги объектларга ҳаводан зарбалар бериб, анклавда рейдлар ўтказди. Деярли уч ҳафта ўтиб, 27 октябрь куни Исроил армияси операция кенгайтирилганини эълон қилди. Худди шу куни Исроил уруш бошланганидан бери Ғазо секторига энг йирик зарбаларини берди. 30 октябрь куни мудофаа вазирлиги Ғазога қўшимча зирҳли техника ва пиёда қўшинлар юборилишини эълон қилди.
Изоҳ (0)