“Толибон” Ўзбекистон билан чегарада Қўштепа каналининг иккинчи қисмини қуришга старт берди (видео)

Афғонистон шимолидаги Балх вилоятида Ўзбекистон билан чегарадош Қўштепа каналининг биринчи қисмини фойдаланишга топшириш ва иккинчи қисмини қуришга старт бериш маросими бўлиб ўтди. Бу ҳақда ТОЛOnewс телеканали хабар берди.

Маросимда сўзга чиққан “Толибон” бош вазири ўринбосари Абдулғани Бародар Қўштепа каналининг ишга туширилиши Афғонистонда сув ресурсларини бошқариш учун зарурлигини таъкидлади.

“Толибон” мудофаа вазири эса Қўштепа канали тараққиётига аралашаётганларнинг “қўлини кесиб ташлаш” билан таҳдид қилди.

Шу билан бирга, “Толибон” вакиллари ўз нутқларида Марказий Осиё минтақаси давлатлари, хусусан, Ўзбекистондан ушбу канал қурилишидан хавотирга тушмасликни сўради, дейилади хабарда.

Қўштепанинг биринчи участкаси узунлиги 108 километр бўлиб, қурилиш белгиланган муддатдан 8 ой олдин якунланди. Амударё сувини Афғонистонга бурадиган каналнинг умумий узунлиги 285 километрни ташкил этади.

Айни пайтда “Маъно” тадқиқот ташаббуслари маркази директори Бахтиёр Эргашев Қўштепа ишга туширилгандан сўнг Марказий Осиё мамлакатлари учун сув тақчиллиги юзага келиши сабабли кескинлик кучайишидан хавотир билдирди. У минтақа давлатлари Мамлакатлараро мувофиқлаштирувчи сув комиссияси доирасида келишилган квоталар бўйича сувни баҳам кўришини эслатди. Бироқ Амударёнинг бошида бўлган Афғонистон ҳеч қандай келишувлар билан тийилмаган, мамлакат қўшни давлатлар билан ҳисоблашмасдан сув олиши мумкин.

Сентябр ойида Оролни қутқариш халқаро жамғармаси саммитида Ўзбекистон президенти Шавкат Мирзиёев томонидан бу борада хавотирлар билдирилганди. Президент Афғонистонни сув ресурсларини бўлишиш бўйича минтақавий мулоқотга жалб қилишни таклиф этди.

Бунга жавобан “Толибон” ҳукуматидаги Сув хўжалиги ва энергетика вазирлиги раҳбари Абдулатиф Мансур амалдаги афғон ҳукумати Амударёдан сув олиш бўйича ҳеч қандай келишувлар билан чекланмаганини таъкидлади.

“Шавкат Мирзиёевнинг Амударё ва Қўштепа канали сувлари билан боғлиқ хавотирлари келишув бўйича мажбуриятлар бузилган тақдирда ўринли бўлар эди. Аммо бу ҳолатда биз ҳеч қандай мажбуриятларни қабул қилмаганмиз. Ҳеч қандай келишув йўқ. Шунинг учун биз ўзимиз зарур деб билган ишни қиламиз”, — деди Мансур.