“Толибон” Ғазодаги шифохонанинг портлатилишини қоралади ва буни инсониятга қарши жиноят деб атади. Бу ҳақда “Толибон” ҳукумати баёнотида айтилади.
“Афғонистон Ислом Амирлиги бутун дунё халқи ва ҳукуматлари, инсон ҳуқуқлари ташкилотлари, Бирлашган Миллатлар Ташкилоти ва Ислом Ҳамкорлик Ташкилотидан Исроил террорининг тез орада такрорланишининг олдини олишни сўрайди”, — дейилади баёнотда.
Толибларнинг қўшимча қилишича, “бундай даҳшат ва ваҳшийликка чек қўйилмаса, минтақадаги вазият янада оғирлашиб, назоратдан чиқиб кетиши мумкин”. Бу эса бутун минтақа ва дунё давлатларига зарар етказувчи реакцияларга йўл очади.
Ғазо шаҳридаги Ал-Аҳли баптистлар касалхонасига 17 октябрь оқшомида Исроил томонидан берилган авиазарба оқибатида юзлаб фаластинликлар ҳалок бўлди ёки яраланди. Касалхонадаги черков Исроил ҳужумлари сабаб уйларини тарк этган фаластинликларга бошпана берганди.
Ал-Аҳли касалхонасига уюштирилган ҳужум Туркия, Араб Лигаси давлатлари, Жаҳон соғлиқни сақлаш ташкилоти ва Европа Иттифоқи вакили Шарл Мишел томонидан қораланди. Россия ва Бирлашган Араб Амирликлари Ғазодаги шифохонага уюштирилган ҳужум муносабати билан 18 октябрь куни БМТ Хавфсизлик кенгашининг фавқулодда йиғилишини ўтказишни сўради.
Изоҳ (0)