10-октябр куни Афғонистонга 45 нафар қозоғистонлик қутқарувчи жўнатилди, деб хабар бермоқда Қозоғистон Фавқулодда вазиятлар вазирлиги. ФВВнинг бир гуруҳ куч ва воситалари Қосим-Жўмарт Тўқаев топшириғи билан фалокат ҳудудига юборилган.
“Ҳирот вилоятига етиб келган заҳоти, тун бўлишига қарамай, қозоқ қутқарувчилари қидирув-қутқарув ишларини бошлади. Улар учун иш майдони сифатида Ҳирот шаҳридан 25-30 км узоқликда жойлашган Наиброфи ҳудудида белгиланади. Шуниси эътиборга лойиқки, расмийлар ушбу ҳудудни энг қийин деб атаган. Айнан шу ерда бедарак йўқолганлар сони кўп”, — дейилади Қозоғистон ФВВ хабарида.
Ҳирот раҳбарияти “самарадорлик учун миннатдорлик билдирган ва кеча-ю кундуз ишлашга шай қутқарувчиларнинг руҳидан ҳайратда қолган”.
Бундан ташқари, бугун, 11-октябр куни Қозоғисон Афғонистонга гуманитар юкнинг биринчи қисмини юборди. Тўқаев топшириғига мувофиқ Қозоғистон томонидан моддий ёрдам ҳам кўрсатилмоқда.
“Давлат моддий захирасидан озиқ-овқат, чодир, кийим-кечак, кўрпа-тўшаклар ажратилди. Ҳаммаси бўлиб жўнатилаётган гуманитар юклар рўйхатида 1 659 тонна юк бор”, — дея маълум қилди Қозоғистон ФВВ.
Шунингдек, SK Pharmacy Афғонистонга дори-дармонлар ажратган. Дори-дармон ва чодирлар Қозоғистон Миллий гвардияси самолёти орқали жўнатилди. Афғонистон томони уларни бугун уларни қабул қилади. Гуманитар ёрдамнинг қолган қисми темирйўл орқали етказилади.
Изоҳ (0)