“АҚШнинг навбатдаги хатоси”. Путин Украинага ATACMS ракеталари етказиб берилганига муносабат билдирди

Россия президенти АҚШ расмийлари Украинага кассетали ўқ-дорилар билан бирга узоқ масофали ATACMS ракеталарини жўнатганига муносабат билдирди.

“Биринчидан, бу, албатта, зарар келтиради, қўшимча хавф туғдиради. Иккинчидан, биз бу ҳужумларни, шубҳасиз, қайтараишга қодирмиз. Улар таҳдид солаётганини айтдим, бу ўз-ўзидан тушунарли. Лекин энг муҳими шундаки, улар алоқа чизиғидаги вазиятни ўзгартиришга умуман қодир эмас. Бу аниқ”, — деди Путин Пекиндаги матбуот анжуманида.

Путин ATACMS ракеталарининг етказилишини АҚШнинг яна бир хатоси деб атади:

“Бу АҚШнинг навбатдаги хатоси. Бунга бир нечта сабаблар бор. Биринчидан, улар қурол-яроғ билан таъминламаганида, келажакда айтиши мумкин, агар қўлимиздан келганини қилганимизда, вазият ўзгарган бўларди, керакциз қурбонлар бўлмасди, деб. Улар қурол беришди, аммо натижа ҳам бўлмайди. Шунинг учун бу хато. Украина учун ҳам яхшилик бўлмайди. Бу фақат азоб-уқубатни чўзади.

Ва ниҳоят, ҳалигача кўринмаётган, лекин катта хато шундаки, Қўшма Штатлар бу можарога тобора кўпроқ жалб қилинмоқда”.

Украина Қуролли кучлари 17 октябрь куни илк бор ATACMS ракеталарини қўллади, деб маълум қилди Украина президенти Владимир Зеленский АҚШ президенти Жо Байденга миннатдорлик билдириб. Америка матбуоти хабарларига кўра, АҚШ армияси Украинага 160 километр масофага учадиган ракеталарнинг кичик партиясини топширган. Вашингтон ракеталар берилгани ҳақида расман эълон қилгани йўқ.