АҚШ президенти Жо Байден Украина президенти Владимир Зеленскийга Вашингтон Киевга ATACMS узоқ масофали ракеталарининг кичик партиясини топширишига ваъда берди. Бу ҳақда манбаларга таяниб, NBC News телеканали хабар берди.
Телеканал суҳбатдошлари ракеталар қачон юборилиши ёки таъминот ҳақида қачон расман эълон қилинишига аниқлик киритмади.
Тhе Washington Post газетаси, ўз навбатида, Байден маъмурияти Киевга анъанавий эмас, кластерли каллакка эга ATACMS'ларни топшириш ниятида эканини ёзди.
АҚШ Давлат котиби Энтони Блинкен матбуот анжуманида Киевга ATACMS ракеталарини бериш имконияти ҳақидаги саволга жавобан шундай деди:
“Биз (уруш) бошиданоқ Украина билан музокаралар олиб бормоқдамиз, уларга энг керакли нарсаларни етказишга ҳаракат қиляпмиз.. ушбу жараён давом этади”.
Худди шундай савол Украина президенти Владимир Зеленскийга Канада бош вазири Жастин Трюдо билан қўшма матбуот анжуманида берилди. Бунга жавобан Украина раҳбари АҚШ президенти билан учрашувда Украина Қуролли кучларининг эҳтиёжлари муҳокама қилингани ва АҚШ Украина ҳаво ҳужумидан мудофаа тизимини кучайтиришга ваъда берганини айтди.
Украина бир неча ойдан бери АҚШдан узоқ масофали ATACMS ракеталарини сўраб келади. Уларнинг ҳаракат масофаси 300 километрни ташкил қилади; Киев улардан халқаро тан олинган Россия ҳудудига ҳужумлар учун фойдаланмасликка ваъда бермоқда.
Байден ва Зеленский 21-сентябр куни Оқ уйда учрашган. Украина президенти кенг кўламли уруш бошланганидан бери АҚШга иккинчи бор ташриф буюрди. Оммавий ахборот воситалари ушбу учрашув натижасида ATACMS етказиб бериш расман эълон қилинишини кутган эди, аммо бундай бўлмади.
Изоҳ (0)