Ғазо шаҳридаги Ал-Аҳли баптистлар касалхонасига 17 октябрь оқшомида Исроил томонидан берилган авиазарба оқибатида юзлаб фаластинликлар ҳалок бўлди ёки яраланди. Касалхонадаги черков Исроил ҳужумлари сабаб уйларини тарк этган фаластинликларга бошпана берганди.
Ғазо Соғлиқни сақлаш вазирлигининг маълум қилишича, 200 дан 300 гача одам ҳалок бўлган. Кейинроқ 500 дан ортиқ ҳалок бўлгани ҳақида хабарлар пайдо бўлди. Al-Arabiya қурбонлар сони 800 кишидан ошганини ёзди. Яна юзлаб одамлар вайроналар остида қолиб кетган, деди вазирлик. Ҳалок бўлганлар ҳақида аниқ расмий маълумотлар йўқ. Фаластин раҳбари Маҳмуд Аббос Ал-Аҳли касалхонасига уюштирилган ҳужум туфайли уч кунлик мотам эълон қилди.
ОАВ касалхонадаги портлаш оқибатлари акс этган суратларни эълон қилди.
Ал-Аҳли касалхонасига уюштирилган ҳужум Туркия, Араб Лигаси давлатлари, Жаҳон соғлиқни сақлаш ташкилоти ва Европа Иттифоқи вакили Шарл Мишел томонидан қораланди. Россия ва Бирлашган Араб Амирликлари Ғазодаги шифохонага уюштирилган ҳужум муносабати билан 18 октябрь куни БМТ Хавфсизлик кенгашининг фавқулодда йиғилишини ўтказишни сўради.
Исроил армияси Ғазо секторидаги шифохонага зарба бермаганини даъво қилмоқда. Исроил ҳарбийларига кўра, “Исломий жиҳод” гуруҳи томонидан муваффақиятсиз ракета учирилиши Ал-Аҳли касалхонаси яқинида портлаш келтириб чиқарган.
Исроил бош вазири Биньямин Нетаньяху шифохонага “фаластинлик жангарилар” ҳужум қилганини айтди.
“Бутун дунё билиши керак: Ғазо секторидаги касалхонага Исроил эмас, ваҳший террорчилар ҳужум қилган. Фарзандларимизни ваҳшийларча ўлдирганлар ўз фарзандларини ҳам ўлдирган”, — деб ёзди у Twitterъда.
Изоҳ (0)