Жиззахда гиёҳванд моддалар савдоси ортидан бир гуруҳ фуқаролар қамоққа олинди (видео)

Жиззах ва Қашқадарёда қарийб салкам 15,5 кило гиёҳвандлик воситасининг ноқонуний савдосига чек қўйилди, деб хабар бермоқда ДХХ матбуот хизмати.

ДХХнинг Жиззах вилояти бўйича бошқармаси ходимлари томонидан вилоят божхона бошқармаси билан ҳамкорликда ўтказилган тезкор тадбирда, Тожикистоннинг Сўғд вилояти Панжикент туманида яшовчи, 1970 йилда туғилган Тожикистон фуқароси Жиззах вилоятининг Бахмал туманида яшовчи, 1983 ва 1984 йилларда туғилган икки таниши билан ўзаро тил бириктириб, Тожикистондан контрабанда йўли билан келтирилган 9 килограмм 530 грамм опий моддасини 55 минг долларга сотган вақтида ушланган.

ДХХ ходимлари томонидан вилоят ИИБ билан ҳамкорликда Зомин туманида ўтказилган тезкор тадбирда эса 1958, 1976 ва 1985 йилларда туғилган уч нафар Тожикистон фуқароси ушланиб, улардан 2 килограмм 986 грамм гашиш моддаси процессуал тартибда расмийлаштириб олинган.

Шунингдек, тезкор тадбир давом эттирилиб, уларни Даштобод шаҳарчасидаги умумий овқатланиш масканида кутиб турган, 1979 йилда туғилган яна бир Тожикистон фуқароси ушланган. Аниқланишича, ушбу гиёҳвандлик воситаси ҳам Тожикистондан олиб келинган.

ДХХ Қашқадарё вилояти бўйича бошқармаси ходимлари томонидан вилоят божхона ва ички ишлар бошқармалари билан ҳамкорликда ўтказилган тезкор тадбирда, Бухоро—Қашқадарё йўналишида ҳаракатланаётган, Бухоро шаҳрида яшовчи, 1982 йилда туғилган шахс бошқарувидаги Matiz Муборак туманидаги “Ширинбулоқ” ЙПХ масканида тўхтатилиб, кўздан кечирилган.

Натижада автомашинада у билан бирга келаётган ҳамшаҳари, 1998 йилда туғилган фуқаронинг ёнида 973 грамм героин борлиги аниқланиб, тегишли тартибда расмийлаштириб олинган.

Дастлабки суриштирув ҳаракатлари давомида, Бухоро вилоятининг Когон туманидаги дала майдонига 1 килограмм 968 грамм героин кўмиб қўйилгани аниқланиб, ушбу гиёҳвандлик воситаси ҳам процессуал тартибда расмийлаштириб олинган.

Ҳозирда ушбу ҳолатлар юзасидан ДХХнинг жойлардаги тергов бўлимлари томонидан мазкур шахсларга нисбатан Жиноят кодексининг 246- ва 273-моддалари билан жиноят ишлари қўзғатилиб, қамоққа олиш тарзидаги эҳтиёт чораси қўлланган.

Тергов ҳаракатлари олиб борилмоқда.