Туркия бутун дунёдаги, айниқса, Африкадаги очарчилик хавфи остида бўлган ҳудудларга ёрдам бериш бўйича саъй-ҳаракатларини давом эттирмоқда. Бу ҳақда Туркия президенти Ражаб Тоййиб Эрдўғон Бутунжаҳон озиқ-овқат куни муносабати билан йўллаган видеомурожаатида маълум қилди.
Унинг сўзларига кўра, Туркия Украина қишлоқ хўжалиги маҳсулотларини Қора денгиз орқали жаҳон бозорларига олиб чиқиш имконини берувчи “дон шартномаси”ни тузишга ҳисса қўшиб, глобал озиқ-овқат инқирозининг олдини олишга ёрдам берган.
“БМТ билан ҳамкорликда амалга оширилган Қора денгиз (дон) ташаббуси туфайли биз жаҳон бозорларига 33 миллион тонна дон маҳсулотларини етказиб беришни таъминлаш орқали глобал озиқ-овқат инқирози хавфининг олдини олдик”, — деди Туркия раҳбари. Унинг таъкидлашича, мамлакат “ҳар қандай муаммо, жумладан озиқ-овқат ва сув муаммоси бўйича масъулиятни ҳеч иккиланмасдан ўз зиммасига олишга тайёр”.
БМТ маълумотларига кўра, дунёда ҳар тўққиз кишидан бири очликдан азият чекмоқда. Шу билан бирга, дунёда йилига 5 миллиард тоннагача озиқ-овқат ишлаб чиқарилади.
“Бу ҳажм 2050 йилга прогноз қилинаётган дунё аҳолиси учун етарли деб ҳисобланса-да, афсуски, бугунги дунё аҳолиси учун етарли эмас. Чунки дунёда ҳар сонияда ишлаб чиқарилаётган 127 тонна озиқ-овқатнинг 21 тоннаси исроф қилинмоқда. Бунча озиқ-овқат очликдан азият чекаётган 735 миллион одамни тўрт марта қорнини тўйдиришга етган бўларди”, — деди у.
Изоҳ (0)