Украина президенти Владимир Зеленский АҚШ давлат котиби Энтони Блинкен билан бирга Исроилга ташриф буюришни режалаштирган. Бироқ, Ynet ёзишича, Исроил томони ҳозирда Украина президентининг ташрифи бевақт бўлишини маълум қилган.
Энтони Блинкеннинг Яқин Шарққа ташрифи Исроил ва Фаластиннинг ҲАМАС ҳаракати ўртасидаги зиддиятни ҳал қилишга қаратилган эди. Ynet сайтининг ёзишича, Владимир Зеленский Америка делегациясига қўшилишни режалаштирган, бироқ якунда унинг сафари амалга ошмаган.
Сайтнинг қайд этишича, ҳозирги рад этиш “Зеленский Исроилга умуман келмаслигини англатмайди”. Бундай ташриф кейинроқ амалга ошиши ва Украина президентининг Европа давлатларига кейинги сафарларидан бири билан бирлаштирилиши мумкин.
АҚШ давлат котибининг Яқин Шарқ бўйлаб сафари 12 октябрь куни Исроилга ташриф билан бошланди. Кейин Иорданияга етиб келди ва у ердан Қатарга йўл олди. Шундан кейин Блинкен Баҳрайн ва Саудия Арабистонига ташриф буюрди.
Исроил ва Фаластиннинг ҲАМАС ҳаракати ўртасидаги уруш 7 октябрдан бери давом этмоқда. Сўнгги маълумотларга кўра, Ғазо секторида қурбон бўлганларнинг умумий сони 2,7 минг кишига, Исроилда эса 1,3 минг кишига етган.
Изоҳ (0)