Turkiya butun dunyodagi, ayniqsa, Afrikadagi ocharchilik xavfi ostida bo‘lgan hududlarga yordam berish bo‘yicha sa’y-harakatlarini davom ettirmoqda. Bu haqda Turkiya prezidenti Rajab Toyyib Erdo‘g‘on Butunjahon oziq-ovqat kuni munosabati bilan yo‘llagan videomurojaatida ma’lum qildi.
Uning so‘zlariga ko‘ra, Turkiya Ukraina qishloq xo‘jaligi mahsulotlarini Qora dengiz orqali jahon bozorlariga olib chiqish imkonini beruvchi “don shartnomasi”ni tuzishga hissa qo‘shib, global oziq-ovqat inqirozining oldini olishga yordam bergan.
“BMT bilan hamkorlikda amalga oshirilgan Qora dengiz (don) tashabbusi tufayli biz jahon bozorlariga 33 million tonna don mahsulotlarini yetkazib berishni ta’minlash orqali global oziq-ovqat inqirozi xavfining oldini oldik”, — dedi Turkiya rahbari. Uning ta’kidlashicha, mamlakat “har qanday muammo, jumladan oziq-ovqat va suv muammosi bo‘yicha mas’uliyatni hech ikkilanmasdan o‘z zimmasiga olishga tayyor”.
BMT ma’lumotlariga ko‘ra, dunyoda har to‘qqiz kishidan biri ochlikdan aziyat chekmoqda. Shu bilan birga, dunyoda yiliga 5 milliard tonnagacha oziq-ovqat ishlab chiqariladi.
“Bu hajm 2050-yilga prognoz qilinayotgan dunyo aholisi uchun yetarli deb hisoblansa-da, afsuski, bugungi dunyo aholisi uchun yetarli emas. Chunki dunyoda har soniyada ishlab chiqarilayotgan 127 tonna oziq-ovqatning 21 tonnasi isrof qilinmoqda. Buncha oziq-ovqat ochlikdan aziyat chekayotgan 735 million odamni to‘rt marta qornini to‘ydirishga yetgan bo‘lardi”, — dedi u.
Izoh (0)