Россия президенти Владимир Путин “Бир макон, бир йўл” форумида иштирок этиш учун 17 октябрь куни Хитойга боради. Ташриф олдидан Путин Хитой медиа корпорациясига интервью берди. Бошқа нарсалар қаторида, Россия президентидан Украинадаги уруш ва низони тинч йўл билан ҳал қилиш истиқболлари ҳақида сўралди.
Путин Хитойнинг сиёсий ечим топишга уринишларини қадрлашини, бироқ “нариги томон ҳеч қандай музокаралар олиб боришни истамаётганини” айтди.
“Украина расмийлари жанг майдонида ғалаба қозонишга, Россияни стратегик мағлуб қилишга интилаётганини эълон қилишди.
Қарши ҳужум деб аталадиган фаол ҳарбий ҳаракатларни бошлашди. Бу 4 июндан бери давом этяпти. Ҳозирча ҳеч қандай натижа йўқ, фақат катта йўқотишлар бор. Йўқотишлар жуда катта – нисбатан олганда, тахминан ҳар саккиз (ҳарбий)дан бири”, — деди Путин.
Россия президенти, шунингдек, АҚШнинг 2014 йилда Украина ички сиёсатига аралашуви, Донбасс аҳолисининг ўлдирилиши, Киевнинг нейтрал мақомдан воз кечиши ва НАТОга қўшилиш истаги, бажарилмаган Минск келишувлари ҳақидаги тезисларини такрорлади.
Сўнгги ойларда Россия президенти Украина қўшинлари катта йўқотишларга дучор бўлаётганини бир неча бор таъкидлаган, аммо у келтирган маълумотлар мустақил манбалар томонидан тасдиқланмаган. Путин Украина ҳужумининг “муваффақиятсизлиги” ҳақида биринчи марта гапираётгани йўқ.
Хитойга ташриф Халқаро жиноий суд Путинни ҳибсга олишга ордер берганидан кейин унинг МДҲ давлатларидан ташқаридаги биринчи сафари бўлади. Ордер берилганидан кейин Путин Россияни биринчи марта 15 октябрь куни тарк этди — у Бишкекдаги МДҲ саммитида қатнашди.
Изоҳ (0)