Буюк Британия ҳукумати парламентга 2009 йил 1 январдан кейин туғилган шахсларга тамаки маҳсулотларини сотишни тақиқловчи қонун лойиҳасини киритмоқчи.
Британия ҳукумати веб-сайтида таъкидланишича, келажакда тамаки сотишнинг энг кичик ёши ҳар йили бир йилга ошириб борилади: бу чора тақиқ мамлакатнинг бутун аҳолисига тааллуқли бўлгунга қадар давом этади. Расмийлар тақиқнинг жорий этилиши 2040 йилгача ёшлар орасида чекишни деярли бутунлай тўхтатиш имконини беради деб кутмоқда.
“Мен фарзандларимиз учун яхшироқ ва ёрқинроқ келажакни қурмоқчиман, шунинг учун мен чекишни бутунлай йўқ қилмоқчиман. Бу ўзгаришлар фарзандларимизнинг ҳеч қачон сигарет сотиб ололмаслигини таъминлайди, уларнинг чекишга одатланиб қолишига йўл қўймайди ҳамда ҳозир ва келажакда уларнинг саломатлигини ҳимоя қилади”, — деди ташаббус муаллифи Буюк Британия бош вазири Риши Сунак.
Буюк Британияда тамаки сотиб олишга 18 ёшдан рухсат берилган бўлиб, ҳукумат маълумотларига кўра, ҳар йили 64 мингга яқин одам чекиш оқибатлари туфайли ҳаётдан кўз юмади. Ҳар ойда 75 мингга яқин фуқаро чекиш билан боғлиқ касалликлар туфайли шифокорларга мурожаат қилади. Ҳар йили мамлакат иқтисодиёти чекиш билан боғлиқ ишсизлик, эрта ўлим ва соғлиқни сақлаш харажатлари туфайли қарийб 17 миллиард фунт (тахминан 21 миллиард доллар) даромадни йўқотади.
Муайян ёшдан ошган фуқаролар учун тамаки сотишни тўлиқ тақиқлаган биринчи мамлакат Янги Зеландия бўлганди. 2022 йил декабрида мамлакат парламенти 2009 йил 1 январдан кейин туғилганларга тамаки сотишни умрбод тақиқловчи қонунни қабул қилди.
Изоҳ (0)