Арманистон Озарбайжон билан чегарадаги воқеаларни текшириш учун Халқаро жиноят суди (ХЖС) таъсис ҳужжати – Рим статутини ратификация қилишни бошлади, деди бош вазир Никол Пашинян Жамоат телевидениесига берган интервьюсида.
Унинг аниқлик киритишича, гап 2021 йил май ва 2022 йил сентябрь ойларида чегарада содир бўлган воқеалар ҳақида кетмоқда; ратификация жараёнининг ўзи ўтган йилнинг декабрида бошланган. ХЖС иштироки “Коллектив хавфсизлик шартномаси ташкилоти ўз мажбуриятларини бажармаган ва бажармаётган” шароитда Арманистон хавфсизлигини сезиларли даражада ошириши мумкин. Пашиняннинг таъкидлашича, Ереван содир бўлаётган воқеаларни эътиборсиз қолдира олмайди, ҳукумат қўшимча халқаро хавфсизлик воситаларини олишга уринмоқда.
“Афсуски, Россия ва Гаага жиноят суди ўртасидаги муносабатлар контекстида бу ёмон тасодиф бўлди. Ратификация жараёнининг арман-рус муносабатларига мутлақо алоқаси йўқ, чегарадаги таранглик билан боғлиқ”, — дея тушунтирди Пашинян
Пашинян Ереван низомни нега илгари ратификация қилмаганига изоҳ берар экан, ўшанда республика Конституциявий суди ушбу ҳужжат ва Асосий қонун ўртасидаги зидликни аниқлаганини айтди.
“2015 йилдан бери Арманистонда янги конституция мавжуд, бу зидлик йўқ бўлиб кетди ва биз ўз йўлимизда олға кетяпмиз, чунки биз бу ҳужжатни имзолаганмиз”, — деди бош вазир.
АҚШ билан ҳарбий машғулотлар ва Пашинян рафиқасининг Украинага бориши
Россия томонининг бошқа даъволарига жавобан Пашинян арман ва америкалик ҳарбийлар ўртасида қўшма машғулотлар биринчи марта ўтказилмаётганини эслатиб, рафиқасининг Украинага ташрифини сиёсийлаштирмасликка чақирди. У рафиқаси анчадан бери бошқа давлатлар биринчи хонимлари билан халқаро ҳамкорлик доирасидаги ёрдам тадбирларда иштирок этиб келаётганини алоҳида таъкидлади.
Арманистон 1999 йилда Рим статутини имзолаган, аммо уни ратификация қилмаган. 2022 йил охирида ҳукумат Арманистон Конституциявий судидан Озарбайжоннинг Тоғли Қорабоғдаги хатти-ҳаракатларини кўриб чиқиш учун ХЖС юрисдикциясини тан олишни сўради. 1 сентябрь куни Арманистон ҳукумати парламентга ХЖСнинг Рим статутини ратификация қилиш лойиҳасини юборди. Бунга жавобан Россия Ташқи ишлар вазирлиги Арманистондан тушунтириш сўради.
Ратификациядан кейин Арманистон Путинни ҳибсга олишга мажбур бўлади
Эслатиб ўтамиз, 17 март куни ХЖС Россия президенти Владимир Путин ва болалар омбудсмани Мария Лвова-Беловани ҳибсга олишга ордер берди. Улар Россия кучлари томонидан босиб олинган Украина ҳудудидан болаларни ноқонуний депортация қилишда айбланмоқда. Рим статутини ратификация қилган давлатлар агар Путин уларнинг ҳудудига қадам босса, Россия президентини ҳибсга олишга мажбур бўлади.
11 сентябрь куни Арманистонда АҚШ контингенти билан ҳарбий машғулотлар бошланди. Йил бошидан бери Ереван КХШТ билан иккита машғулотда қатнашишдан бош тортганди.
Изоҳ (0)