Адолф Гитлернинг Браунау шаҳридаги собиқ уйи полиция участкаси ва туман полиция бошқармасига айлантирилади. Қайта қуриш ишлари аллақачон бошланган, деб хабар берди Оrf телеканали.
Қурилиш ишлари тахмина 2026 йилнинг биринчи чорагида якунланади. Ҳукумат қайта қуриш учун 20 миллион евро сарфлашни режалаштирмоқда. Уй 2016 йилдан бери Австрия ҳукуматига тегишли бўлиб, унгача бинода Лебеншилфе федерал ҳаётни қўллаб-қувватлаш ассоциацияси жойлашган эди: ундан ногиронлар учун марказ сифатида фойдаланилган.
Телеканалнинг аниқлик киритишича, уй олдидаги уруш ва фашизмга қарши ёдгорлик тоши сақланиб қолади. Қайта қуришдан мақсад — уйнинг неонацистлар учун зиёратгоҳ сифатидаги мавқейини камайтириш.
2016 йилда Австрия ҳукумати Гитлер туғилган уйни бузиб ташлашни режалаштирганди, чунки у неонацистлар учун зиёратгоҳ бўлиб хизмат қилади. Расмийлар бузилган уй ўрнига маъмурий тузилмалар ёки хайрия ташкилоти жойлашган янги бино қурмоқчи бўлди. Бироқ кейинчалик ҳукумат аъзолари уйни бузиш ғоясидан воз кечди.
Гитлер 1889 йилда Браунауда туғилган. У уч ёшга тўлганда, оиласи у ердан кўчиб кетган. 1938 йилда Гитлер Германияда ҳокимият тепасига келганида, нацистлар уйни сотиб олди. 1952 йилда, диктаторнинг ўлимидан етти йил ўтгач, бино ўзининг биринчи эгалари — Поммерлар оиласига қайтарилди.
Изоҳ (0)